奇想


臻是一個懶人, 除了自己喜歡的, 甚麼事也不願做。

爸:『你咁唔鍾意做功課, 不如唔好返學, 上午打羽毛球, 下午踢足球,  夜晚睇電視, 好唔好呀?』

臻不敢回答, 但他的表情, 很嚮往, 很滿足!

爸:『你以為真架? 你就想嘞!』

我也希望有自己夢想的生活, 臻, 也可以!

晚飯回家。

我們等過馬路時, 臻拿着水樽左拋右盪。

我:『臻, 你知唔知你係到 fing 個樽, 有幾危險?』

臻:『唔知呀!』

我:『你諗吓! 有咁大, 講咁大!』

臻:『個樽會打到架車既玻璃, 跟住又打到啲機器, 跟住撞上行人路, 撞到人!』

爸:『媽咪, 你又講吓有幾大件事吖!』

我:『架車撞到前面架車, 再撞前面架車, 連環幾撞, 跟住撞到行人路啲人, 又撞死埋! 』

爸:『哈哈哈! 有幾大件事呀?? 無啲創意!』

我:『咁你有幾創意呀?』

爸:『個樽打到架車, 架車又撞前面啲車, 好多車撞埋一齊, 震到成個屋苑都『林』埋, 成個屋苑啲人都死晒, 之後成個屋苑再震到個海, 整到海嘯, 跟住全世界都有事, 全世界啲人都死晒! 咁至係最嚴重架嘛!』

臻:『哈哈哈…..』

我:『有無再誇張啲呀!!』

颱風到, 大家做好防風措施。

臻:『媽咪, 做乜野事呀, 啲玻璃?』

我:『打風嘛! 』

臻:『驅邪呀!』

我:『驅邪咁架咩?』

臻:『蒜頭係咪都係驅邪架?』

我:『哈哈哈…… 乜野係邪啫?』

臻:『妖怪囉!』

八掛。

媽:『好似一排都無見過阿 A 行過咁既!』

爸:『個日先見到佢同老婆行過! 佢老婆大肚呀!』

媽:『你點知人哋大肚呀?』

爸:『我見到佢老婆過馬路時, 隻手掩住個肚, 咁就係大肚啦!』

媽:『邊個講咁樣就係大肚呀?』

爸:『阿臻講既!』

媽:『哈哈哈…..佢點知呀?』

爸:『佢話有次舅母接佢放學時, 佢係咁樣過馬路, 臻就懷疑佢係有左 BB, 點知原來真係有左呀!』

我的駕駛執照已續領了一次, 我的駕駛經驗卻很少。

雖然如此, 但我懂得基本的安全守則。

坐在司機旁, 看見人家不安全駕駛, 不打燈, 隨意轉線…… 我會忍不住, (在車內) 罵他們幾句。

有些司機若等交通燈而停在我旁的, 我更會用不善的眼光對待。

爸:『媽咪, 你咁樣, 乜人都鬧, 揸唔到車喎!』

我:『佢哋係危險嘛! 我真係好想鬧佢哋架!』

爸:『係咁架嘞!』

我:『如果第時, 前面架車揸得唔好, 影響其他車, 後面架車, 可以撞前面架車罰佢, 不過後面架車又唔會撞襯, 咁就好嘞!』

爸:『你唔好話, 如果前面架車揸得唔好, 可以即時扣佢八達通錢仲好啦!』

我:『點即時扣呀? 又要八達通機, 又要落車!』

爸:『我都無話要落車! 你既方法, 咁都諗得到, 我有乜可能做唔到扣錢呀! 話扣錢就扣啦!』

臻:『哈哈哈……』

姨媽:『不如個車頭撞吓前面個車尾扣錢啦!』

我:『咁都可以喎!』

其實, 我覺得, 有人想得出的要求, 有人一定做到!

我想的, 我相信終有一天, 會有人研究出來!

有新樓盤在奧海城設示範單位讓有興趣人士參觀, 很多地產經紀在商場附近推銷。

媽:『臻, 好多人喎! 你估吓啲人係到做乜?』

臻:『唔知喎!』

媽:『估吓啦!』

臻:『係到吸煙!』

(噢! 問題原來太深!)

 

後一頁 »