我是歌手

臻很喜歡收看內地音樂節目『我是歌手』。

他溫書, 不可看電視。

扮路過。

臻：『媽咪, 第九集, 最後係邊個出場呀?』

我：『唔…… 好似牛仔狄克!』

臻很疑惑：『吓??』

爸：『動力火車呀!』

我：『差唔多啫, 有咪四個字!』

 

 

街頭連摑跪地男友十四巴惡女被捕

一則新聞 ——『街頭連摑跪地男友十四巴惡女被捕』。

我：『第時臻會唔會咁架? 要俾臻睇吓呢段新聞先。』

爸：『睇完之後, 佢話第時娶大陸女仔, 唔娶香港女仔呀!』

 

博上鏡

TVB 到足球學校拍攝。

臻站在藝人身後, 博上鏡。

 

結他 —— 衝上雲宵

臻愛看衝上雲宵劇集, 學校今年又以衝上雲宵為教學主題, 令他更喜歡衝上雲宵。

他不是一個『音樂人』, 但他靠耳朵默出主題曲的音諳, 彈出來。

雖然只是彈得一句, 但很欣賞他的自學精神。

 

長襪蓋膝

看電視。

有女藝人穿短裙, 長襪蓋膝。

我：『 Daddy, 不如我都買對長襪, 好似佢咁着咯! 』

爸：『好呀!』

我：『得咩?』

爸：『得!! 臻都係咁着架啦!』

 

決戰一分鐘

臻拿着衣架, 走進房間。

臻邊走邊叫：『好掛住你!』

我：『講乜呀你??』

 

做戲

我遲了回家, 臻還未睡覺。

我：『Daddy, 點解臻仲未瞓架?』

爸：『佢睇電視嘛!』

我：『點解你俾佢睇電視呀?』

爸：『我都無俾佢睇!』

我：『唔該, 以後十點前要上床瞓覺!』

爸走入臻的房間。

爸：『最衰你! 我俾人鬧! 』

臻：『又關我事!』

爸提高聲線：『臻! 你以後唔准睇電視!』

臻誇張地：『啊!!』

爸：『我要打你!!』

臻：『哎呀! 好痛呀! 好痛呀……』

 

『天梯』大結局

我是一個很『眼淺』的人, 看電視劇也會流眼淚。

『天梯』大結局最後部份, 很浪漫, 很感人。

苗天帶着新月行上山找會笑的月亮, 又搭了一間小屋。

我：『老公, 你帶我上山吖!』

老公：『死左先會上山咕喎!』

臻大笑。

最後苗天去逝。

臻：『媽咪, 點解新月大過苗天, 苗天會死先既?』

我：『通常男人都短命啲架!』

臻：『吓!!』

我：『做乜呀? 你好驚呀?』

臻：『係呀! 我好驚你白頭人, 送黑頭人呀!』

 

NBA

臻一早便起床, 收看 NBA 的賽事。

他看得入神, 看得緊張。

差不多兩小時, 我也要趕着出門。

我：『臻, 走嘞! 趕時間呀!』

臻：『仲有五十幾秒, 好緊張呀, 俾我睇埋先啦!』

五十多秒, 不用一分鐘, 我也不會那麼不近人情。

我關冷氣, 關窗, 關燈……

開始覺得奇怪, 為什麼還未完場。

電話響了!

爸：『出門口未呀?』

我：『臻話要睇埋場波先呀!』

爸：『仲有幾耐呀!』

我望望電視：『三十幾秒呀!』

爸：『三十幾秒, 你都可能要睇幾分鐘喎!』

我：『吓? 臻都無講我聽要咁耐!』

爸：『佢成世人都未睇過 Live 架! 佢都唔知架!』

我：『吓?』

臻：『俾我睇埋啦! 真係好緊張呀!』

 

麥當勞廣告

麥當勞最新廣告。

爸：『臻, 你想唔想做運動員呀?』

臻：『想呀!我想做足球員呀！』

爸：『你睇吓，運動員參加唔到奧運，就去麥當勞到做，你想唔想呀？』

臻：『唔去麥當勞做！』

爸：『點解呀？』

臻：『我寧願去 Circle K 做，每日放學之後，都可以整撈麵俾自己食！』

爸：『吓？你去Circle K 做既時候，你仲要返學架咩？』