大年初三 2012

臻參加小學同學的團拜派對。

每個小朋友要帶備一張自己設計的揮春。

臻很用心的寫了一個字。

 

大年初二 2012

舅父介紹了一個大人小朋友都適合玩的遊戲。

拜年沒事做, 大家圍着圈, 消磨時間, 最好不過。

 

大年初一 2012

一年一度的魚蝦蟹大戰又來了!

臻主持大局。

臻：『買啦! 唔該買啦!』

我：『臻, 唔洗咁斯文架! 『買定離手!』咁就得架嘞!』

臻笑。

臻：『買啦! 唔該買啦!』

最後, 臻贏了幾元。

臻：『媽咪, 呢啲可唔可以做零用錢呀?』

我：『可以! 不過, 只可以係新年玩一次架咋! 平時唔准架!』

 

行花市

做了九龍人, 都應該在新的地方行個花市, 打個招呼。

其實, 我們都只是逛逛, 湊熱鬧, 沒有什麼買。

我：『臻, 不如我哋講吓有乜野年花吖!』

臻：『吉!』

我：『桃花!』

爸：『蘋果!』

我：『吓? 蘋果??』

爸：『頭先有一檔有盆蘋果樹, 有蘋果係到, 又係花市見到, 咪即係年花囉!』

我：『五代同堂!』

臻：『水仙!』

爸：『橙!』

我：『吓?』

爸：『啲人成日話食蘋果同橙, 咁佢哋都係一齊架啦! 咁橙都係架啦!』

我：『菊花! 咦! 臻, 點解啲菊花咁多唔同顏色既?』

爸：『佢哋化左妝嘛!』

 

再遇『羅湖』

告別了九個月的『羅湖』, 爸在一停車場再遇。

新的車主依舊用着我們的車牌號碼。

我和臻聽到這個消息, 很雀躍, 因為沒想過會有機會再見。

我：『 Daddy, 你見到佢, 有乜野感覺呀?』

爸：『好似見返個舊女朋友咁!』

 

床頭位(二)

虐兒?  非也!

虐妻?  非也!

自虐?  他認為我是。

三年前, 我將臻的床頭位搬離了窗口後, 臻的病痛少了!

所以, 搬屋後, 我再搬床頭位一次。

之前都是我一力操刀, 今次雖然房間細小了, 但我相信一定做得到。

很可惜, 我不斷嘗試嘗試再嘗試, 用了九十分鐘, 都是陷入一個死局。

房子太細, 床子太重, 牆壁與家具碰撞, 花了不少。

雙手雙肩, 太過用力, 也『花』了少。

我堅信自己可以做到, 但最後, 很氣餒很沮喪地致電他求救。

他帶着工具回家, 不消五分鐘, 輕鬆的完成。

沒有得到安慰問候, 卻換來一句又一句的說話。

他：『你有乜可能自己搬到呀?』

我：『你覺得我唔夠力唔得, 定係間房太細唔得呀?』

他：『兩樣都係!』

我：『我覺得我做到, 同埋我要我自己做到! 其實, 我真係好唔想放棄架!』

他：『呢啲野唔洗你做啦, 你叫我做咪得囉! 你只係做個啲我叫你做既野就得嘞!』

我：『如果唔係我搬到一半, 你都唔知幾時至幫我搬啦!』

開工前, 我跟臻說：『搬床, 好大工程架! 你知唔知乜野係大工程呀?』

臻：『即係好多野整囉!』

我：『差唔多啦! 唔係咁容易架!』

完成後, 我將書本放回書架時, 臻嚷着要玩。

我：『未得呀, 唔好玩住啦!』

臻：『啊! 工程未完成呀?』

我：『係呀係呀!』

現在的房間, 擺位跟未搬前的屋子一樣, 很有親切感。

 

中國文化日

迎接龍年的來臨, 及讓學生認識中國文化, 學校設計了很多有中國文化特色的活動。

其中有中國小食的示範, 當家長義工的我負責啄啄糖的攤位。

小朋友試食完啄啄糖後, 我邀請了幾位小朋友嘗試用工具啄糖。

臻很想參與, 他回家時問我為何不選他。

我：『第一: 要公平啲! 第二: 因為你係我個仔, 所以要更加公平!』

 

用詞文雅

臻說話的用詞, 有時也很文雅。

他從露台望到遊樂場的小朋友, 他：『咦! 好熱鬧喎!』

他遇到不能解決的問題時, 他：『我會去探索吓架嘞!』

他回答問題時：『除左呢啲….同呢啲……其他我唔會考慮架嘞!』

他準備玩陀螺時：『我要揀返一個適當既發射器!』

他穿了一雙不合規格的運動鞋回校, 我問他是否有人發現, 他說：『無人注意到我喎!』

他計數時, 我送上草稿紙, 他：『原來你早有預備!』

我責怪他洗澡時間太長, 他：『我一向都係沖一個鐘咁耐架啦!』

 

樓價

近幾個月, 我們不時也會談及樓價。

估不到臻也留意我們的說話。

臻看到小巴上的廣告。

臻：『咦! 咁貴既! 六百幾呎就三百六十萬?? 元朗一千呎都係差唔多價錢喎!』

 

 

認識自己。 欣賞別人。

閒談。

我：『臻, 你靚唔靚仔呢?』

臻：『靚仔!』

我：『有唔有型呢?』

臻：『有型!』

我：『咁, 你識邊個係有型過你架呢?』

臻：『阿 A 囉!』

我：『佢點有型呢?』

臻：『佢帶眼鏡有型, 不過, 唔帶眼鏡仲有型!』

我：『你覺得佢係本身有型, 定係着衫有型呢?』

臻：『唔明!』

我：『有啲人係本身有型, 着乜野衫都會有型! 不過, 有啲人係本身唔係好有型, 不過着左啲有型衫, 就變左好有型! 阿 A 係邊種呢?』

臻：『着衫有型!』

我：『咁你着佢啲衫, 你會唔會有型呢?』

臻：『我唔着佢個啲衫架!』

我：『點解呢?』

臻：『我着自己啲衫啱我啲!』