說不完的故事

媽小時聽過一個故事, 媽將這故事講給臻聽, 他覺得很有趣。

『從前山上有一個和尚, 個和尚係到做乜呢? 佢係到講故事喎! 佢講乜野故事呢? 佢話：從前山上有一個和尚, 個和尚係到做乜呢? 佢係到講故事喎! 佢講乜野故事呢? 佢話：從前山上有一個和尚, 個和尚係到做乜呢? 佢係到講故事喎! 佢講乜野故事呢? 佢話……』

這是爸的版本：

『從前有一條屎虫, 條屎虫屙左舊屎, 舊屎入面有一條屎虫, 條屎虫又屙左舊屎, 舊屎入面又有一條屎虫……』

臻也作了一個版本：

『從前有一個人係到錄影, 佢係到錄乜野呢? 佢係到錄一個人, 呢個人係到做乜野呢? 佢係到錄影喎! 佢係到錄乜野呢? 佢係到錄一個人, 呢個人係到做乜野呢? 佢係到錄影喎!……』

 

蒸籠

做了媽媽後, 過年我也會做些糕。

桂花馬蹄糕做法簡單, 做小小的一盆, 打扮一下, 便可送禮表心意。

臻喜歡吃年糕, 而我想做紅棗年糕, 所以, 今年會有新嘗試!

爸喜歡吃芋頭糕, 而我覺得坊間的蘿蔔糕不好吃, 所以, 今年依然都會做這兩款糕。

我懂得蒸糕時, 已買了這蒸籠。

還記得臻第一次在家看見這蒸籠時的反應。

蒸籠對臻來說, 就是等於叉燒包!

臻：『媽咪, 你整叉燒包呀?』

媽：『咁大個叉燒包, 好難整喎!』

 

揮春2010

| View Show | Create Your Own

虫姨問我是否有毛筆墨汁, 有否練習寫大字的習慣, 她想要一些度身訂製的揮春。

我有工具, 但不是我用的。

我的字, 怎能見人!

剛巧我買了紙, 打算讓臻寫揮春, 就請臻為虫姨提筆。

除了虫姨要求的句子外, 臻還寫了給其他人, 內容是他自己作的。

媽媽 —— 美麗媽咪

爸爸 —— 愛屎爸爸

舅父 —— 年年新球 (因舅父說從沒有自己的足球!)

慧慧姐姐 —— 美麗慧慧

壹壹表弟 —— UN G G  (奀咕咕)

姨媽 —— 月生月多

 

計錯數

睡前, 臻會總結每日所得的分數。

那晚, 他在房間自己計算這條算式。

之後, 他在大叫。

臻：『媽咪, 有啲奇怪呀!』

媽以為有什麼事發生：『做乜事呀?』

臻：『媽咪, 你入黎睇吓!』

臻：『二百幾分, 加五十五, 點解會變左三百幾架! 有啲奇怪呀!』

媽一看, 計錯數也!

媽：『你計多次睇吓!』

臻很快便找出錯處。

很高興臻能發現有問題! 他不是死記算式, 他有理解數字的能力!

 

足總幼苗培訓09-10

臻參加了足總的幼苗培訓。

他很興奮, 因為, 他第一次擁有一件有號碼的球衣。

他是二號仔!!

| View Show | Create Your Own

 

臻出世時……

臻：『媽咪, 孖生個啲 BB, 係咪同一時間出世架? 咁點知邊個係哥哥, 邊個係細佬呀!』

媽：『第一個係媽咪個肚出黎個個咪哥哥, 遲啲出黎個個咪細佬囉! 哥哥可能只係大細佬幾秒或者幾分鐘架咋!』

臻很驚訝：『吓? 就係咁架咋?』

媽：『係呀! 你出世時呢, 媽咪個肚痛左十二個鐘呀!』

臻：『咁係咪要好大力生架?』

媽：『係呀! 個肚又肚, 又要出力生!』

臻：『點出力呀?』

媽：『好似屙屎咁架! 不過, 又唔可以屙喎!』

臻：『哈哈哈! 咁會唔會屙左舊屎出黎架?』

媽：『有啲人都會架! 你知唔知呀, 我個肚痛左十二個鐘之後……已經開左十度(又攞尺出黎, 話佢知十度有幾多), 你應該可以出黎, 不過, 你個頭『惡』高左, 出唔到黎!……之後, 我就開刀嘞!』

臻：『咁我真係對你唔住嘞!』

媽：『做乜對我唔住呀?』

臻：『我整到你開刀嘛!』

媽心都軟了, 摟抱着臻：『傻豬黎架……』

 

第二十屆元朗藝術節

元朗兒童合唱團在這節日裹有份參與演出。

我們在毫無準備下, 發現臻和同學仔代表元朗兒童合唱團預備組接受紀念旗。

媽覺得臻大個了不少!

 

睡前刷牙

睡前。

媽：『臻, 刷牙嘞! 刷牙先瞓呀!』

臻好像聽不到, 繼續他的工作。

媽再叫：『臻, 刷牙嘞! 刷牙先瞓呀!』

臻亦都好像聽不到, 繼續他的工作。

媽又再叫：『臻, 刷牙嘞! 刷牙先瞓呀!』

臻依然好像聽不到, 繼續他的工作。

媽有點火：『臻, 你仲玩, 依家幾多點呀? 你依家要做乜野呀?』

臻還很雀躍地在床上跳：『筆落啲! 筆落啲! 筆落啲!』

媽：『講乜野呀你! 』

臻：『筆落啲, 咪即係 brush your teeth 囉!』

媽笑：『咁你仲唔去筆落啲! 快啲啦! 好夜嘞!』

 

數碼暴龍遊戲機

學校附近有一間遊戲店, 店外有一座數碼暴龍遊戲機。

臻很渴望可以打機, 但我不批准, 我只准他觀看。

一日, 我們在冒險樂園玩, 臻用積分換了數碼暴龍卡, 他興奮極了!

爸覺得臻平時很乖的儲分, 應該讓他換取心愛物品。

所以, 我亦開始軟化, 有條件地讓他打機和買卡。

臻現在每日都目標, 好像打工仔般, 星期一等星期五, 因為只有 Happy Friday 至可以打機。

 

吃菜加分

 

若臻吃一條荷蘭豆, 爸會加臻一千分。

臻真的做到!

我看着臻吃荷蘭豆時, 有點心痛。

不知是心理作用, 還是生理作用, 臻每次吃菜都會『想嘔』。

看着他『想嘔』又很開心拿到分數的樣子, 心不忍。